Passkey. ինչպես է այն փոխարինում գաղտնաբառին, և որքանով է այն իրականում ապահով

Եթե վերջերս մուտք եք գործել Google, Microsoft, Apple կամ Facebook հաշիվ, հավանաբար տեսել եք այսպիսի առաջարկ. «Ստեղծե՞լ passkey»։ Եթե դուք էլ երբևէ սեղմել եք «Ոչ հիմա»՝ չհասկանալով, թե ինչ է դա, այս հոդվածը ձեզ համար է։

Passkey-ներն արդեն լայնորեն օգտագործվում են։ Հոկտեմբերի 15-ին FIDO Alliance-ը հայտարարեց, որ աշխարհում օգտագործվում է մոտ 7 միլիարդ passkey։ FIDO Alliance-ը միջազգային կազմակերպություն է, որը մշակում է passkey-ների ստանդարտը, և որի անդամներից են Google-ը, Apple-ը և Microsoft-ը։ Իսկ Մեծ Բրիտանիայի կիբեռանվտանգության ազգային կենտրոնը (NCSC) 2026-ի ապրիլին հրապարակած ուղեցույցում խորհուրդ է տալիս գաղտնաբառի փոխարեն օգտագործել passkey ամենուր, որտեղ դա հնարավոր է։

Այս հոդվածում պատմում եմ, թե ինչ է passkey-ը, ինչպես է այն աշխատում, ինչպես սկսել այն օգտագործել և, որ ամենակարևորն է, ինչ դեպքերում այն չի պաշտպանում։

Ինչ է passkey-ը

Passkey-ը հաշիվ մուտք գործելու եղանակ է, որը փոխարինում է գաղտնաբառին։ Գաղտնաբառ հիշելու և հավաքելու փոխարեն դուք պարզապես բացում եք ձեր հեռախոսի կամ համակարգչի կողպեքը մատնահետքով, դեմքով կամ PIN կոդով, այսինքն՝ նույն կերպ, ինչպես ամեն անգամ բացում եք ձեր սարքը։

Ինչպես է այն աշխատում

Երբ ստեղծում եք passkey, ձեր սարքը տվյալ կայքի համար ստեղծում է իրար հետ կապված երկու բանալի.

• գաղտնի բանալին մնում է ձեր սարքում կամ գաղտնաբառերը պահող ծրագրում,
• բաց բանալին պահվում է կայքում։ Այն գաղտնի չէ։

Մուտք գործելիս ձեր սարքը գաղտնի բանալու միջոցով ստեղծում է թվային ստորագրություն, իսկ կայքը բաց բանալու միջոցով ստուգում է, որ ստորագրությունն իսկական է։ Մուտքը թույլատրվում է միայն այդ ստուգումից հետո։ Ընդ որում՝ սերվերը երբեք չի իմանում ձեր գաղտնի բանալին։

Այսինքն՝ գաղտնաբառի դեպքում կայքը պահում է մի բան, որը կարելի է գողանալ։ Իսկ passkey-ի դեպքում կայքում պահվում է միայն բաց բանալին, և, ինչպես նշում է Apple-ը, այնտեղ գողանալու գաղտնաբառ պարզապես չկա։

Ինչու է այն ավելի ապահով

Կեղծ կայքերը չեն կարող այն օգտագործել։ Գաղտնաբառեր գողանալու ամենատարածված եղանակներից մեկը ֆիշինգն է. մարդուն ուղարկում են կեղծ կայքի հղում, որը նման է իրական կայքին, և նա այնտեղ մուտքագրում է իր տվյալները: Passkey-ն աշխատում է միայն այն կայքում կամ հավելվածում, որի համար ստեղծվել է, ուստի կեղծ կայքը չի կարող խաբեությամբ ստանալ այն։ Սա հատկապես կարևոր է այսօր. Microsoft-ը նշում է, որ արհեստական բանականությամբ ստեղծված ֆիշինգային արշավներում հղման վրա սեղմողների թիվը կարող է հասնել 54%-ի։

Այն հնարավոր չէ պատահաբար տալ ուրիշին։ Ի տարբերություն գաղտնաբառի, passkey-ը հնարավոր չէ ուրիշին ասել, պատճենել կամ գրի առնել։

Ձեր մատնահետքը և դեմքի պատկերը ոչ մի տեղ չեն ուղարկվում։ Google-ը, Microsoft-ը և Meta-ն նշում են, որ այդ տվյալները մնում են ձեր սարքում։ Մատնահետքը կամ դեմքը միայն թույլ են տալիս սարքին օգտագործել passkey-ը։

Այն միանգամից երկու պաշտպանություն է։ Մուտք գործելու համար պետք է և՛ սարքը, որում պահված է passkey-ը, և՛ այդ սարքը բացող PIN կոդը, մատնահետքը կամ դեմքը։ Այս պատճառով Microsoft-ը passkey-ը համարում է բազմագործոն նույնականացում, այսինքն՝ պաշտպանության մի քանի շերտ միաժամանակ։

Այն նաև ավելի հարմար է։ FIDO Alliance-ի հոկտեմբերյան տվյալներով՝ passkey-ով մուտքն ավելի հաճախ է հաջողվում, քան գաղտնաբառով և սովորական երկքայլ նույնականացմամբ մուտքը, և գրեթե երեք անգամ ավելի արագ է։

Որտեղ է պահվում passkey-ը

Կա passkey-ի երկու տեսակ։

Բոլոր սարքերում հասանելի passkey. Այն պահվում է գաղտնաբառերի պահոցում և հասանելի է ձեր բոլոր այն սարքերում, որոնցում մուտք եք գործել նույն հաշվով։

• Apple. Passkey-ները պահվում են iCloud Keychain-ում, որը գաղտնագրված է այնպիսի բանալիներով, որոնք Apple-ն ինքը չգիտի։
• Google. Chrome-ը passkey-ները պահում է Google Password Manager-ում, այսինքն՝ ձեր Google հաշվում։ Դրանք հասանելի են յուրաքանչյուր սարքում, որտեղ Chrome-ում կամ Android-ում մուտք եք գործել նույն հաշվով։ Համակարգչում առաջին անգամ passkey պահելիս Google-ը կարող է խնդրել ստեղծել առանձին PIN կոդ, որը կօգնի նոր սարքում վերականգնել ձեր passkey-ները։
• Microsoft. 2026-ի ապրիլից Microsoft Password Manager-ը նույնպես պահում է passkey-ները և դրանք հասանելի է դարձնում բոլոր այն սարքերում, որոնցում մուտք եք գործել ձեր Microsoft հաշվով։ Այն աշխատում է Microsoft Edge բրաուզերում, իսկ գրանցման և վերականգնման համար օգտագործվում է ձեր ընտրած PIN կոդը։

Կարելի է օգտագործել նաև այլ ընկերությունների գաղտնաբառերի պահոցներ։

Մեկ սարքում պահվող passkey. Այն երբեք դուրս չի գալիս այն սարքից, որում ստեղծվել է, օրինակ՝ անվտանգության հատուկ բանալուց (security key)։ FIDO Alliance-ի խոսքով՝ սա պաշտպանության ամենաբարձր մակարդակն է։ Բայց եթե կորցնեք սարքը և չունեք պահուստային passkey կամ հաշիվը վերականգնելու այլ եղանակ, կկորցնեք նաև passkey-ը։

Ինչպես սկսել

Google հաշիվ. Բացեք passkey-ների էջը, ընտրեք «Create a passkey» և բացեք ձեր սարքի կողպեքը։ Մուտքի և վերականգնման ձեր մյուս եղանակները կմնան։ Նոր ստեղծված passkey-ը մուտքի համար կարող է հասանելի դառնալ մինչև 7 օրում։

Apple սարքեր. Passkey-ներն աշխատում են iCloud Keychain-ի միջոցով, և դրանց համար ձեր Apple հաշվում պետք է միացված լինի երկքայլ նույնականացումը։

Microsoft հաշիվ. Microsoft-ի նոր հաշիվներն այլևս գաղտնաբառ չեն պահանջում, իսկ արդեն գոյություն ունեցող հաշիվների տերերը կարող են իրենց գաղտնաբառն ընդհանրապես ջնջել։ Windows-ում passkey-ով մուտք եք գործում Windows Hello-ի միջոցով՝ PIN կոդով, մատնահետքով կամ դեմքով։ Microsoft-ի տվյալներով՝ ընկերության ծառայություններում, այդ թվում՝ OneDrive-ում, Xbox-ում և Copilot-ում, ամեն օր հարյուր միլիոնավոր օգտատերեր մուտք են գործում passkey-ով։

Facebook և Messenger. Facebook-ում passkey կարելի է օգտագործել iOS և Android սարքերում, իսկ 2025-ի սեպտեմբերից այն աստիճանաբար հասանելի է դառնում նաև Messenger-ում։ Նույն passkey-ն աշխատում է երկու հավելվածում էլ։ Այն ստեղծվում և կառավարվում է Facebook-ի կարգավորումներում՝ Accounts Center բաժնում։ Այն սարքերում, որոնք չեն աջակցում passkey-ներին, կարելի է շարունակել մուտք գործել գաղտնաբառով։

Ինչ սարքեր են անհրաժեշտ. Passkey-ներն աշխատում են Windows 10, macOS Ventura, ChromeOS 109, Android 9, iOS 16 և դրանց ավելի նոր տարբերակներում, ինչպես նաև Chrome, Edge, Safari և Firefox բրաուզերների նոր տարբերակներում։ Հեռախոսում պետք է միացված լինի էկրանի կողպեքը։

Կայքերը հաճախ passkey ստեղծելու առաջարկ են անում հենց մուտք գործելիս։ Եթե տեսնեք «Create a passkey?» կամ «Sign in faster with your face, fingerprint or PIN» պատուհանը, կարող եք պարզապես հետևել քայլերին։

Հաճախ տրվող հարցեր

Ինչպե՞ս մուտք գործել ուրիշի համակարգչից։ Համակարգչի էկրանին կհայտնվի QR կոդ, որը սկանավորում եք ձեր հեռախոսով, և մուտքը հաստատում եք հեռախոսում։ Այս դեպքում ձեր passkey-ը չի պահվում ուրիշի համակարգչում։ Համակարգը նաև ստուգում է, որ հեռախոսն իսկապես գտնվում է համակարգչի մոտ, որպեսզի հեռվից գործող հարձակվողը չկարողանա օգտագործել այն։ Դրա համար Bluetooth-ը պետք է միացված լինի։

Ի՞նչ անել, եթե կորցնեմ հեռախոսս։ Բոլոր սարքերում հասանելի passkey-ները կհայտնվեն նոր սարքում, երբ այնտեղ մուտք գործեք նույն հաշվով։ Google-ը խորհուրդ է տալիս մեկ այլ սարքից մուտք գործել ձեր Google հաշիվ և ջնջել կորած սարքի passkey-ը։ Apple-ը թույլ է տալիս վերականգնել passkey-ները նույնիսկ բոլոր սարքերը կորցնելու դեպքում, բայց դրա համար անհրաժեշտ են ձեր iCloud գաղտնաբառը, SMS-ով ստացված կոդը և սարքի կողպեքի կոդը։ Այստեղ կա կարևոր սահմանափակում. վերականգնման համար տրվում է առավելագույնը 10 փորձ։ Մի քանի անհաջող փորձից հետո վերականգնումը կողպվում է մինչև Apple-ի աջակցության ծառայությանը դիմելը, իսկ 10-րդ անհաջող փորձից հետո պահուստային պատճենն ընդմիշտ ոչնչացվում է։ Դրա համար Apple-ը առաջարկում է նախապես նշանակել վերականգնման կոնտակտ՝ վստահելի մարդ, որը կօգնի վերականգնել մուտքը, եթե մոռանաք Apple հաշվի գաղտնաբառը կամ սարքի կողպեքի կոդը։ Իսկ Microsoft-ը խորհուրդ է տալիս passkey ունենալ ձեր յուրաքանչյուր սարքում, որպեսզի մեկը կորցնելու դեպքում կարողանաք մուտք գործել մյուսով։

Կարո՞ղ եմ դեռ օգտագործել գաղտնաբառը։ Google-ի դեպքում՝ այո։ Passkey-ն ինքնաբերաբար չի փոխարինում ձեր գաղտնաբառին։ Եթե նախընտրում եք նախ գաղտնաբառով մուտք գործել, կարգավորումներում անջատեք «Skip password when possible» տարբերակը։

Ինչու՞ է ինձ մոտ passkey հայտնվել, եթե ես այն չեմ ստեղծել։ Որոշ համակարգեր passkey-ն ստեղծում են ինքնաբերաբար։ Օրինակ՝ Chrome-ը կարող է ինքը passkey ստեղծել, որպեսզի հաջորդ անգամ ավելի արագ մուտք գործեք։ Եթե չեք ուզում, որ դա տեղի ունենա, Google Password Manager-ի կարգավորումներում անջատեք «Automatically create a passkey to sign in faster» տարբերակը։ Apple-ի սարքերում հավելվածներն ու կայքերը նույնպես կարող են passkey ստեղծել գաղտնաբառով մուտք գործելուց անմիջապես հետո։ Այդ դեպքում գաղտնաբառը շարունակում է աշխատել, իսկ passkey-ն ավելանում է որպես մուտք գործելու ևս մեկ ապահով եղանակ։

Աշխատո՞ւմ է արդյոք ամենուր։ Ոչ։ Passkey-ով կարելի է մուտք գործել միայն այն կայքեր և հավելվածներ, որոնք աջակցում են այս տեխնոլոգիային։ Աշխատանքային կամ ուսումնական հաշիվներում passkey կարող եք օգտագործել միայն այն դեպքում, եթե ձեր կազմակերպությունը դա թույլ է տալիս։ Որոշ համակարգերում passkey-ները կարող են չաշխատել նաև Incognito ռեժիմում։

Արդյո՞ք passkey-ն անխոցելի է

Ոչ, և սա կարևոր է իմանալ։ 2026-ի օգոստոսին Palo Alto Networks ընկերության Unit 42 հետազոտական թիմը հրապարակեց հետազոտություն, որում նկարագրված են Google-ի passkey-ների դեմ երեք հարձակում։ Հետազոտությունը վերաբերում է Windows համակարգչում Chrome բրաուզերով օգտագործվող Google Password Manager-ին։

Ահա թե ինչ պետք է իմանալ այս հետազոտության մասին.

• Բոլոր երեք հարձակումները հնարավոր են միայն այն դեպքում, եթե ձեր համակարգչում արդեն վնասակար ծրագիր կա։
• Passkey-ի գաղտնագրությունը կոտրված չէ։ Հետազոտողները թերություններ են գտել ոչ թե բուն տեխնոլոգիայում, այլ այն բանում, թե ինչպես են Chrome-ը և Google-ի համակարգը վստահում սարքերին և վերականգնում մուտքը։
• Ամենավտանգավոր հարձակումը վերաբերում է գլխավոր բանալուն, որով Google-ի համակարգը գաղտնագրում է օգտատիրոջ բոլոր passkey-ները։ Հետազոտողները պարզել են, որ այդ բանալին բաց տեքստով երևում էր Chrome-ի տեխնիկական գրառումներում (log-երում)։ Google-ը հեռացրել է այն այդ գրառումներից։ Բայց, ըստ հետազոտողների, սարքը նորից գրանցելիս բանալին դեռ հասանելի է Chrome-ի հիշողության մեջ, և Google-ի ներկայիս համակարգում այն փոխել կամ անվավեր դարձնել հնարավոր չէ։ Այսինքն՝ նույն բանալիով են պաշտպանված թե՛ այսօրվա, թե՛ ապագա passkey-ները։
• Հետազոտողները ցույց են տվել նաև, որ որոշ կայքեր ճիշտ չէին ստուգում՝ արդյոք օգտատերն իսկապես հաստատել է մուտքը։ Օրինակ՝ eBay-ը հետազոտությունից հետո շտկել է այս թերությունը։

Հետազոտողները passkey-ը համարում են անվտանգության էական քայլ առաջ, բայց զգուշացնում են, որ այն չի պաշտպանում, եթե ձեր սարքն արդեն վարակված է։ NCSC-ն էլ նշում է, որ passkey-ները զգալիորեն նվազեցնում են ֆիշինգի վտանգը, երբ ձեր սարքերն ու հավելվածները թարմացված են։

Կեղծ զանգեր և SMS-ներ՝ passkey-ը «թարմացնելու» պատրվակով։ Սեպտեմբերի 9-ին Microsoft-ը հրապարակեց զեկույց խարդախությունների մասին, որոնք ընկերությունը նկատում է 2026-ի մայիսից։ Խարդախները զանգում են կամ SMS ուղարկում՝ ներկայանալով որպես տեխնիկական աջակցության աշխատակիցներ, և պնդում են, որ պետք է շտապ թարմացնել passkey-ը կամ մուտքի կարգավորումները։ Այնուհետև մարդուն ուղարկում են Microsoft-ի մուտքի կեղծ էջ, որի հասցեում կարող է լինել նաև «passkey» բառը, կամ համոզում են մուտքագրել կոդ, որը իրականում խարդախին մուտք է տալիս հաշիվ։ Հաշիվը գրավելուց հետո խարդախներն ավելացնում են իրենց հեռախոսահամարը կամ նույնականացման հավելվածը, որպեսզի այլևս կարիք չունենան տիրոջ հաստատմանը։ Microsoft-ը նշում է, որ passkey-ն այստեղ կոտրված չէ. այն պարզապես պատրվակ է։ Այս հարձակումներն ուղղված էին կազմակերպությունների աշխատակիցներին, բայց խարդախության եղանակն ինքնին բոլորին պետք է զգուշացնի։

Ինչ սահմանափակումներ ունի passkey-ը

Passkey ստեղծեք միայն ձեր սեփական սարքերում։ Google-ը հստակ զգուշացնում է. ով կարող է բացել passkey պահող սարքը, կարող է մուտք գործել նաև ձեր հաշիվ, նույնիսկ եթե դուք դուրս եք եկել հաշվից։ Այսինքն՝ եթե ձեր հեռախոսի PIN կոդը գիտի մեկ ուրիշը, նա նույնպես կարող է օգտագործել ձեր passkey-ը։

Passkey-ն այնքան ապահով է, որքան ձեր ամենաթույլ մուտքի եղանակը։ Շատ ծառայություններ passkey-ի կողքին թողնում են նաև մուտքի հին եղանակները՝ գաղտնաբառը, SMS-ով կամ էլ. փոստով ստացվող կոդերը։ FIDO Alliance-ը նշում է, որ այդ դեպքում հաշիվը շարունակում է խոցելի մնալ ֆիշինգի համար. նման կոդերը, անկախ նրանից, թե ինչ ճանապարհով են ուղարկվում, կարելի է մուտքագրել նաև կեղծ կայքում։ Այսինքն՝ եթե passkey ստեղծելուց հետո ձեր գաղտնաբառը մնում է, խարդախը կարող է փորձել գողանալ հենց այն։ Որոշ ծառայություններ թույլ են տալիս գաղտնաբառն ընդհանրապես ջնջել, օրինակ՝ Microsoft-ը։

Կախվածություն մեկ ընկերությունից։ Բոլոր սարքերում հասանելի passkey-ները պահվում են կոնկրետ ընկերության ծառայությունում՝ Apple-ի, Google-ի, Microsoft-ի կամ գաղտնաբառերի այլ պահոցում։ Երկար ժամանակ դրանք մի ծառայությունից մյուսը ապահով տեղափոխելու ստանդարտ եղանակ չկար, և 2024-ին FIDO Alliance-ը ներկայացրեց նման ստանդարտի նախագիծ։ Այժմ Apple-ի սարքերում՝ iOS 26-ից և macOS 26-ից սկսած, passkey-ները կարելի է ապահով կերպով տեղափոխել մի պահոցից մյուսը։ Տեղափոխումը սկսում է ինքը օգտատերը, այն հաստատվում է Face ID-ով կամ սարքի այլ կողպեքով, և այդ ընթացքում ոչ մի չգաղտնագրված ֆայլ չի ստեղծվում։ Սակայն սա աշխատում է միայն այն պահոցների միջև, որոնք աջակցում են այս հնարավորությանը։

Գաղտնաբառերը դեռ չեն վերացել։ FIDO Alliance-ն ինքն է ընդունում, որ գաղտնաբառն այլևս լավագույն տարբերակը չէ, բայց դեռ ամենաշատ օգտագործվողն է։ Ընկերությունների կեսից ավելին աշխատակիցների մուտքի համար դեռ հիմնականում օգտագործում է գաղտնաբառեր։ Իսկ նույնիսկ passkey ունեցող մարդիկ միշտ չէ, որ այն օգտագործում են, քանի որ որոշ ծառայություններ մուտքի ժամանակ դեռ առաջինը գաղտնաբառ կամ կոդ են առաջարկում։

Ինչ են ցույց տալիս թվերը աշխարհում

2026-ի մայիսին FIDO Alliance-ը հրապարակեց հետազոտություն, որին մասնակցել են 11 000 մարդ տասը երկրից՝ ԱՄՆ-ից, Մեծ Բրիտանիայից, Ֆրանսիայից, Գերմանիայից, Ավստրալիայից, Սինգապուրից, Ճապոնիայից, Հարավային Կորեայից, Չինաստանից և Հնդկաստանից։ Մասնակիցների 90%-ը գիտի passkey-ների մասին, 75%-ն առնվազն մեկ հաշվում passkey է միացրել, իսկ 49%-ը պարբերաբար օգտագործում է այն, երբ հնարավորություն ունի։ Միաժամանակ 33%-ը նշել է, որ վերջին մեկ տարվա ընթացքում իր հաշիվը կոտրվել է, կամ ինքը ծանուցում է ստացել տվյալների արտահոսքի մասին։

Իսկ հոկտեմբերին հրապարակված FIDO-ի Passkey Index-ի համաձայն, որը հիմնված է 15 խոշոր ծառայությունների տվյալների վրա, այդ ծառայություններում հաջող մուտքերի ավելի քան մեկ երրորդն արդեն կատարվում է passkey-ով։

Իմ կարծիքը

(Սա իմ մասնագիտական կարծիքն է, ոչ թե ստուգված փաստ։)

Passkey-ը վերջին տարիների ամենակարևոր փոփոխություններից է սովորական օգտատիրոջ անվտանգության համար։ Երկար տարիներ մեր հաշիվների պաշտպանությունը կախված էր նրանից, թե որքան ուշադիր ենք մենք. արդյոք կնկատենք կեղծ կայքը, արդյոք չենք օգտագործի նույն գաղտնաբառը տարբեր տեղերում, արդյոք որևէ մեկին չենք ասի հաստատման կոդը։ Passkey-ն այս պատասխանատվությունը մարդուց փոխանցում է տեխնոլոգիային. կեղծ կայքը չի կարող այն օգտագործել, որքան էլ համոզիչ լինի։ Իսկ երբ արհեստական բանականությունը ֆիշինգային նամակներն ավելի համոզիչ է դարձնում, սա ոչ թե պարզապես հարմարություն է, այլ անհրաժեշտություն։

Բայց passkey-ն անվտանգության խնդիրը չի վերացնում, այլ այն տեղափոխում է այլ տեղ։ Նախկինում հարձակվողին պետք էր ձեր գաղտնաբառը, այժմ նրան պետք է ձեր սարքը։ Unit 42-ի հետազոտությունը ցույց տվեց, որ եթե համակարգիչն արդեն վարակված է, passkey-ն էլ կարող է խոցելի դառնալ։ Ինձ ամենաշատը մտահոգում է այն, որ, ըստ հետազոտողների, Google-ի համակարգում օգտատիրոջ passkey-ները պաշտպանող գլխավոր բանալին հնարավոր չէ փոխել։ Եթե այն մեկ անգամ գողացվի, վտանգի տակ կարող են հայտնվել ոչ միայն այսօրվա, այլև ապագա passkey-ները։ Այն համակարգը, որին միլիոնավոր մարդիկ վստահում են իրենց հաշիվները, պետք է ունենա արտահոսքից հետո անվտանգությունը վերականգնելու հստակ եղանակ, և Google-ը պետք է հրապարակայնորեն բացատրի, թե ինչպես է լուծելու այս խնդիրը։

Microsoft-ի սեպտեմբերյան զեկույցը ցույց է տալիս ևս մեկ կարևոր բան. խարդախները միշտ հետևում են նորություններին։ Որքան շատ են մարդիկ լսում passkey-ի մասին, այնքան ավելի հեշտ է դրա անունով խաբել նրանց, ովքեր դեռ չգիտեն, թե ինչպես է այն աշխատում։ Դրա համար passkey-ը ճիշտ հասկանալն այսօր նույնքան կարևոր է, որքան այն օգտագործելը։

Իմ եզրակացությունը հետևյալն է. passkey-ը պետք է օգտագործել, բայց հասկանալով, որ այժմ ամենակարևորը ձեր սարքն է։ Ահա իմ գործնական խորհուրդները.

• սկսեք ամենակարևոր հաշիվներից՝ Google, Apple, Microsoft, Facebook, որովհետև դրանցով հաճախ մուտք եք գործում նաև այլ ծառայություններ,
• passkey ստեղծեք միայն ձեր սեփական սարքերում և ընտրեք այնպիսի PIN կոդ, որը ուրիշները չգիտեն,
• passkey ստեղծելուց հետո ստուգեք, թե մուտքի ինչ այլ եղանակներ են մնացել ձեր հաշվում, և եթե ծառայությունը թույլ է տալիս, ջնջեք գաղտնաբառը կամ գոնե համոզվեք, որ այն ուժեղ է և ոչ մի այլ տեղ չի օգտագործվում,
• եթե որևէ մեկը զանգում կամ գրում է և շտապեցնում ձեզ «թարմացնել passkey-ը», մի բացեք նրա ուղարկած հղումը։ Մտեք ծառայության կայքը կամ հավելվածն ինքներդ և այնտեղ ստուգեք ձեր կարգավորումները,
• պարբերաբար թարմացրեք օպերացիոն համակարգը և բրաուզերը, և մի տեղադրեք անհայտ աղբյուրներից ստացված ծրագրեր,
• համոզվեք, որ ունեք հաշիվը վերականգնելու աշխատող եղանակ, իսկ Apple-ի սարքերում արժե նշանակել վերականգնման կոնտակտ,
• իսկ եթե որևէ կայք դեռ passkey չի առաջարկում, օգտագործեք ուժեղ գաղտնաբառ, ամեն կայքի համար՝ առանձին, և միացրեք երկքայլ նույնականացումը։

Գաղտնաբառերն աստիճանաբար զիջում են իրենց տեղը, բայց անվտանգության մասին մտածելու անհրաժեշտությունը մնում է։

Աղբյուրներ

FIDO Alliance

• «7 Billion Passkeys and Counting: The Next Chapter of Passwordless Authentication», 2026-ի հոկտեմբերի 15.
• «FIDO Alliance Reports Accelerating Global Passkey Adoption on World Passkey Day 2026», 2026-ի մայիսի 7.
• «Five Billion Passkeys: A Milestone, Not a Finish Line», 2026-ի մայիսի 7.
• «Passkeys».
• «FIDO Alliance Publishes New Specifications to Promote User Choice and Enhanced UX for Passkeys», 2024-ի հոկտեմբերի 14.
• «Passkeys: The Journey to Prevent Phishing», Part 1, 2025-ի մարտ.

Պետական կառույց

• UK National Cyber Security Centre. «Passkeys: what you need to know», 2026-ի ապրիլի 23.

Անվտանգության հետազոտություն

• Palo Alto Networks Unit 42 (Arie Olshtein). «Pass the Passkey: A Novel Attack Surface in Passwordless Authentication», 2026-ի օգոստոսի 3.

Google

• Google Account Help. «Sign in with a passkey instead of a password».
• Google Chrome Help. «Manage passkeys in Chrome».

Apple

• Apple Support. «About the security of passkeys».
• Apple Developer. «What’s new in passkeys», WWDC25.

Microsoft

• Microsoft Support. «Passkeys in Windows».
• Microsoft Edge Blog. «Engineering secure passkey sync in Microsoft Password Manager», 2026-ի ապրիլի 22.
• Microsoft Security Blog. «World Passkey Day: Advancing passwordless authentication», 2026-ի մայիսի 7.
• Microsoft Security Blog. «Passkey-themed social engineering leads to identity and cloud compromise», 2026-ի սեպտեմբերի 9.
• Microsoft Security Blog. «Pushing passkeys forward: Microsoft’s latest updates for simpler, safer sign-ins», 2025-ի մայիսի 1.

Meta

• Meta. «Introducing Passkeys on Facebook for an Easier Sign-In», 2025-ի հունիսի 18, թարմացված՝ 2025-ի սեպտեմբերի 23.